দন্ডবত
রাজবংশী ভাষায় সুখবর!
এই অয়েব–সাইট সমন্দে দুই এক কতা
প্রায় ২০০০ (দুই হাজার) বছর আগত ঈশ্বর উঁয়ার নিজের একেনায় বেটা, "যীশু‘ক" এই দুনিয়াত পেঠ্যাইছিলকে, যাতে দুনিয়ার সউগ মানষিলা যীশুর উপরা বিশ্বাস করিয়া উদ্ধার পায়। এই নাকানের কতা পুরানা শাস্ত্রত নেখায় ছিলেক যে, ঈশ্বর একজন বাছাই করা রাজা পে্যঠাইবে। উঁয়ায় হবে মুক্তিদাতা।
বাছাই করা রাজা যীশুর আইসার আগোত যোহন নামে একজন মানষি ঢোলাই দিয়া, উয়ায় কবার নাগিলেক যে, রাজাটার আইসার আগোত তোমরা পাপের ঘাটা হাতে ঘুরি আইসো, পাপের বাদে পস্তান। যীশু স্যেলা যোহনের-টে আসিয়া দীক্ষা নিলেক। শয়তান-অসুর যীশুক পাপের ফান্দত ফেলেবার চাইলেক। কিন্তুক পাইলেক না। যীশুপ্রচার করির নাগিলেক যে ঈশ্বরের রাইজ্য বগলা-বগলী আসি গেইচে।যীশু ম্যেলা অচানক চিন্ দেখেয়া ঈশ্বরের রাইজ্যের স্বভাব কী নাকান দেখেয়া দিলেক। অসুকিয়া মানষিলা ভাল হইলেক, অপদেবতা মানষিক ছাড়িয়া পালে গেইলেক, যীশু বাতাস আর সাগরের ঢেউওক নিজের আওতাত আনিলেক। মরা চেংড়িক বত্তাইলেক। ঈশ্বরের রাইজ্য সমন্দে যীশু শিক্ষা দিলেক য্যেংকরি বিশ্বাস করা মানষি বুঝির পাইবে। কিন্তুক যায় বিশ্বাস করে না উয়ায় সচাং ঘাটা জানির পাইবে না।এই রাজাটা দু;খ সইয্য করা চাকর। অইন্য মানষির সেবা করিয়া যীশুক দুঃখ কষ্ট ভোগ করির নাগিবে। উয়ায় এই নাকান একটা রাজা। উয়ার চেলালা এইটা বুঝির পাইলেক না। যীশুর বত্তি উঠার পাছত উমরা এইটা বুঝির পাইলেক। যীশু রাজার নাকান করি যিরূশালেমত সোন্দাইলেক আর রাজা হিসাবে উয়াক আতর দিয়া বরণ করিলেক। স্যেলা উঁয়াক মিছাং দোষ দিয়া রোম শাসকের হাতত দিয়া ক্রুশ-খুটাত টাঙেয়া মারি ফ্যেলাইলেক, আর এইটা ঈশ্বরের পরিকল্পনা। ঈশ্বরের একনায় পরানের বেটা সউগ মানষির পাপের বোঝ নিয়া ক্রুশ-খুটাত সঁপে দিলেক। কিন্তুক যীশু ফির তিন দিনের দিন বত্তি উঠিয়া, উয়ায়ে যে ঈশ্বরের একনায় বেটা, এইটা দেখেয়া দিলেক।
